Informata të përgjithshme për programin e studimit: Teknologjitë e Informacionit dhe Komunikimit (TIK) 2024-2027

Permbledhje e Programit

Misioni, objektivat dhe administrimi

Misioni

Programi Bachelor në Teknologjitë e Informacionit dhe Komunikimit (TIK) në Fakultetin e Inxhinierisë Elektrike dhe Kompjuterike (FIEK), Universiteti i Prishtinës, është zhvilluar në përputhje të plotë me misionin e institucionit dhe me nevojat e tregut modern të punës. Programi synon të përgatisë inxhinierë të rinj të aftë për të projektuar, zbatuar dhe menaxhuar sisteme të komunikimit dhe teknologjisë së informacionit që nxisin transformimin digjital të shoqërisë.

Në thelb të misionit qëndron zhvillimi i kompetencave profesionale, teknike dhe kërkimore në fushën e TIK-ut, përmes kombinimit të njohurive teorike dhe përvojës praktike. Programi kontribuon në formimin e një gjenerate të re profesionistësh të cilët do të jenë në gjendje të aplikojnë teknologjitë më të fundit në industrinë e telekomunikimeve, rrjeteve, sistemeve të informacionit dhe shërbimeve digjitale.

Programi gjithashtu kontribuon në misionin e trefishtë të Universitetit të Prishtinës — arsim cilësor, kërkim shkencor dhe shërbim ndaj komunitetit — duke përgatitur profesionistë që ndihmojnë zhvillimin teknologjik e ekonomik të Kosovës dhe rajonit.

Objektivat

Programi Bachelor në Teknologjitë e Informacionit dhe Komunikimit në UP/FIEK është krijuar për t’i pajisur studentët me njohuri të avancuara në fushën e TIK-ut, duke përfshirë aspektet e komunikimeve, rrjeteve kompjuterike, sistemeve të informacionit dhe zhvillimit të softuerit. Përveç aftësive teknike, programi vë theks të veçantë në zhvillimin e aftësive si mendimi kritik, zgjidhja e problemeve, komunikimi profesional dhe puna efektive në grup. Me këtë qasje gjithëpërfshirëse, studentët përgatiten për të përballuar sfidat dhe kërkesat e tregut dinamik të teknologjisë së informacionit dhe komunikimit, si dhe për të kontribuar në inovacionin dhe zhvillimin digjital të shoqërisë.

Pas përfundimit të programit, të diplomuarit do të jenë në gjendje të demonstrojnë njohuri të thella dhe kompetenca praktike në projektimin, zbatimin dhe menaxhimin e sistemeve të avancuara të komunikimit dhe të informacionit, si dhe të kontribuojnë në zhvillimin e zgjidhjeve teknologjike moderne që përmirësojnë jetën e përditshme dhe rrisin efikasitetin në industri.

Objektivat e programit bazohen në misionin e fakultetit, i cili ka prioritet si më poshtë:

• Njohuri të avancuara teorike dhe praktike në fushat themelore të TIK-ut: rrjete dhe komunikime, sisteme të informacionit, programim, cloud computing, siguri kibernetike dhe inxhinieri radio frekuencore.

• Aftësi për të analizuar, projektuar dhe implementuar zgjidhje teknologjike në kontekste reale të industrisë.

• Kompetenca kërkimore për zhvillimin e projekteve dhe inovacioneve që kontribuojnë në sektorin e komunikimeve dhe shërbimeve digjitale.

• Aftësi për të punuar në mënyrë të pavarur dhe bashkëpunuese në mjedise shume disiplinore, duke respektuar standardet etike dhe profesionale të inxhinierisë.

Programi kontribuon drejtpërdrejt në zhvillimin e shoqërisë së bazuar në dije dhe në krijimin e një ekonomie digjitale konkurruese, në përputhje me strategjitë kombëtare dhe agjendën digjitale evropiane.

Rezultatet e të nxënit për programin Bachelor në TIK janë përcaktuar sipas Kornizës Kombëtare të Kualifikimeve (Niveli 6). Pas përfundimit me sukses të programit, studenti do të jetë në gjendje të:

• Kuptojë në mënyrë gjithëpërfshirëse parimet bazë dhe konceptet e avancuara të teknologjive të informacionit dhe komunikimit, duke përfshirë rrjetet me tela dhe pa tela, komunikimet elektronike, sistemet e informacionit dhe programimin.

• Aplikojë metoda dhe teknika bashkëkohore për analizimin, projektimin dhe implementimin e sistemeve të komunikimit dhe zgjidhjeve teknologjike në mjedise reale të punës.

• Përdorë mjete moderne të inxhinierisë për konfigurimin, testimin dhe menaxhimin e rrjeteve, sistemeve të informacionit dhe aplikacioneve të cloud computing.

• Demonstrojë aftësi për të integruar njohuritë teorike me përvojën praktike për zgjidhjen e problemeve komplekse në fushën e TIK-ut.

• Punojë në mënyrë të pavarur ose si pjesë e një ekipi, duke marrë përgjegjësi për rezultatet dhe duke respektuar standardet etike dhe profesionale.

• Zbatojë parimet e sigurisë së informacionit dhe etikës profesionale në zhvillimin dhe menaxhimin e sistemeve teknologjike.

• Demonstrojë aftësi për të ndjekur dhe përvetësuar teknologjitë më të reja në fushën e TIK-ut, duke promovuar të nxënit gjatë gjithë jetës.

• Përdorë qasje kërkimore për të analizuar tendencat e reja në TIK dhe për të zhvilluar zgjidhje inovative që adresojnë nevojat e shoqërisë digjitale dhe të industrisë.

Administrimi i programit

Programi Bachelor në TIK administrohet nga Departamenti i Telekomunikacionit në FIEK dhe miratohet në përputhje me nenet 100–102 të Statutit të Universitetit të Prishtinës. Komisioni i Studimeve i Fakultetit mbikëqyr përgatitjen, rishikimin dhe përmirësimin e kurrikulës, ndërsa Këshilli i Fakultetit dhe Senati i Universitetit miratojnë përfundimisht programin. Zbatimi i tij monitorohet nga strukturat drejtuese të FIEK (Dekani, Prodekanët, Koordinatori për Zhvillim Akademik dhe Zyra e Cilësisë), në bashkëpunim me industrinë e TIK-ut për të siguruar që përmbajtja e programit reflekton kërkesat reale të tregut.

Strukturat drejtuese të Fakultetit kanë përgjegjësinë për organizimin e procesit mësimor, kërkimin shkencor, sigurimin e cilësisë dhe provimet për vlerësimin e studentëve. Për më tepër, Përgjegjësi i Departamentit është përgjegjës për sigurimin e mbarëvajtjes së procesit mësimor në nivel departamenti. Statuti i Universitetit të Prishtinës dhe Rregulloret e Fakulteteve për Organizimin e Proceseve Akademike janë të disponueshme publikisht në faqen e internetit të Universitetit dhe lehtësisht të aksesueshme për të gjithë.

Disa rregullore dhe procedura drejtojnë proceset akademike të Universitetit. Një prej tyre është rregullorja për zhvillimin, rishikimin dhe miratimin e kurrikulave të reja. Kjo rregullore përshkruan procedurat dhe kërkesat që duhet të plotësohen përpara se të prezantohet ndonjë kurrikul e re ose të ndryshohet ndonjë kurrikul ekzistuese. Për më tepër, Universiteti ka një rregullore për vlerësimin dhe përparimin e studentëve gjatë studimeve të tyre, e cila ofron udhëzime për përcjelljen dhe vlerësimin e përparimit akademik të studentëve.

Universiteti ka rregullore dhe procedura specifike për tezat e diplomës BSc dhe MSc. Këto rregullore përcaktojnë kërkesat dhe kriteret që duhet të plotësojnë studentët kur shkruajnë tezat e tyre dhe ofrojnë udhëzime për vlerësimin dhe notimin e tyre. Duke iu përmbajtur këtyre rregulloreve dhe procedurave, Universiteti i Prishtinës siguron që programet e tij akademike të përmbushin standardet më të larta dhe t'u ofrojnë studentëve njohuritë dhe aftësitë që u nevojiten për të pasur sukses në fushat e tyre të zgjedhura.

Kriteret e Pranimit

Pranimet e reja të studentëve në UP ndjekin rregulloret që janë të bazuara në Statutin e UP-së. Njoftimet publike bëhen në ueb faqen e UP dhe ueb faqen e FIEK. Neni 103 i Statutit të UP-së parasheh detaje të përgjithshme për kushtet e pranimit, të cilat zbatohen në mënyrë uniforme për të gjithë kandidatët. Kushtet specifike për studimet Bachelor, duke përfshirë detajet e aplikimit dhe regjistrimit, janë të përshkruara në nenet 6, 7 dhe 8 të Rregullores së UP-së. Për lëndët për provimin pranues vendos Këshilli i FIEK, sipas nenit 103. Tradicionalisht, FIEK zgjedh matematikën për provimin pranues dhe rezultatet zakonisht publikohen brenda 2-3 ditëve.

Kandidatët kanë të drejtë ankimimi brenda 3 ditëve. Komisioni për shpalljen e rezultateve është formuar nga FIEK. Kriteret e aplikimit dhe regjistrimit për studimet Bachelor publikohen në faqen e UP-së në dy thirrje, zakonisht në korrik dhe shtator. 

Përzgjedhja e studentëve për t'u regjistruar në programet e studimit në FIEK u bazua në tre kritere: arritjet e mëparshme të matura me suksesin në shkollën e mesme (30%), pikët e provimit të maturës shtetërore (30%) dhe pikët e provimit pranues të matematikës (40%). I njëjti provim pranues i matematikës u përdor për të gjitha programet e studimit.

Bazuar në nenin 6 të Rregullores së UP-së për studimet bazë- Bachelor, Nr. 22 dt. 13.01.2022, në studimet bachelor kanë të drejtë të aplikojnë të gjithë kandidatët që kanë përfunduar shkollën e mesme dhe kanë përfunduar provimin e Maturës Shtetërore, si dhe kandidatët që kanë përfunduar katër vjet ish-gjimnaz (pa Provim të Maturës Shtetërore). 

Kërkesat/kriteret specifike për kandidatët që kanë kryer arsimin paraprak jashtë Kosovës bazohen në nenin 103 të Statutit të UP-së. Studentët duhet të kenë diploma të vlefshme të shkollës së mesme, apo dokumente të tjera ekuivalente të studimit në përputhje me kërkesat e MASHT-it. Studentët dorëzojnë origjinalin e diplomave dhe notave si dhe certifikatën origjinale të pikëve të provimit të maturës shtetërore.  

Kriteret e Vlerësimit

Të gjitha njësitë akademike të Universitetit të Prishtinës zbatojnë shkallën e mëposhtme të notimit për të vlerësuar arritjet e studentëve:

• 10 dhe 9 – Shkëlqyeshëm (Excellent)

• 8 – Shumë mirë (Very Good)

• 7 – Mirë (Good)

• 6 – Mjaftueshëm (Sufficient)

• 5 – Pamjaftueshëm (Insufficient/Fail)

Studenti e përfundon me sukses një lëndë kur arrin së paku notën 6 (Mjaftueshëm).

Vlerësimi në secilën lëndë mund të përfshijë një kombinim të:

• Provimit final

• Provimeve gjatë semestrit ose kuizeve

• Punës projektuese ose detyrave laboratorike

• Pjesëmarrjes dhe angazhimit në ligjërata

 Shpërndarja e saktë e pikëve ndërmjet këtyre komponentëve përcaktohet në syllabus-in e secilës lëndë, por të gjitha lëndët ndjekin të njëjtën shkallë notimi të Universitetit të paraqitur më sipër.

Rezultatet e pritshme të të nxënit për programin BSc në eknologjitë e Informacionit dhe Komunikimit

Bazuar në misionin e Universitetit të Prishtinës, misionin dhe objektivat strategjike të FIEK-së, si dhe qëllimet e Programit të Studimeve Teknologjitë e Informacionit dhe Komunikimit rezultatet e mëposhtme të të nxënit janë përcaktuar për studentët. Këto rezultate janë kategorizuar në tri grupe: Njohuri, Aftësi dhe Kompetenca, në përputhje me kërkesat e Kornizës Kombëtare të Kualifikimeve të Kosovës (KKK) – Niveli 6.

___________________________  

1. Njohuri

• Njohuri të thella mbi parimet e telekomunikimeve, rrjeteve kompjuterike, sistemeve të informacionit dhe programimit.

• Kuptim gjithëpërfshirës për arkitekturën e rrjeteve, protokollet e komunikimit dhe sigurinë e të dhënave.

• Njohuri për sistemet “cloud”, internetin e gjërave (IoT), inteligjencën artificiale dhe aplikimet e tyre në TIK.

• Kuptim të metodave bashkëkohore të zhvillimit të softuerit dhe teknologjive mobile.

• Njohuri për ndikimin ekonomik dhe social të teknologjive të informacionit dhe komunikimit

___________________________  

2. Aftësi

• Analizojnë kërkesat teknike dhe të zhvillojnë zgjidhje të integruara për sistemet e komunikimit dhe rrjetet.

• Zbatojnë njohuritë e fituara për konfigurimin, menaxhimin dhe sigurimin e rrjeteve me tela dhe pa tela.

• Programojnë dhe zhvillojnë aplikacione për komunikim, përpunim të sinjaleve dhe shërbime cloud.

• Demonstrojnë aftësi të avancuara për zgjidhjen e problemeve teknike dhe optimizimin e performancës së sistemeve.

• Përdorin mjete moderne të inxhinierisë për analizë, simulim dhe projektim të rrjeteve ___________________________  

3. Kompetenca

• Punojnë në mënyrë profesionale dhe etike, duke marrë përgjegjësi për vendime teknike dhe menaxheriale.

• Bashkëpunojnë me ekipe shumëdisiplinore dhe ndërkulturore në projekte kërkimore apo industriale.

• Ndjekin zhvillimet e reja teknologjike në TIK dhe përshtaten me inovacionet e tregut.

• Demonstrojnë aftësi të komunikimit të qartë dhe bindës, me gojë dhe me shkrim, në gjuhën shqipe dhe angleze.

• Aplikojnë parimet e të nxënit gjatë gjithë jetës në karrierën e tyre profesionale.

Pagesat për shkollim

Studimet në FIEK janë pa pagesë për të gjithë studentët e rregullt që ndjekin me sukses programet trevjeçare (Bachelor) dhe nuk përsërisin asnjë vit gjatë studimeve.

Në rast se studenti nuk arrin të kalojë në vitin vijues dhe duhet ta përsërisë vitin akademik, atëherë aplikohet pagesa semestrale prej 25 euro, përkatësisht 50 euro/për vit akademik.

___________________________  

Syllabuset per programin Teknologjite e Informacionit dhe Komunikimit - Syllabuset Shqip